သမီးရဲ့ ပန်းချီ

ပန်းချီကို ချစ်ပါတယ်။ ဆွဲတော့ မဆွဲတတ်ပါ။ ပန်းချီဆွဲတာကို ငယ်ငယ်ကတည်းက လူပုံမှာ နှာခေါင်း မဆွဲတတ်တာနဲ့ လက်လျှော့ လိုက်ရပါတယ်။

ကြည့်ရုံသက်သက်တောင်မှ အလင်းအမှောင်၊ လိုင်း၊ ထုထည် စတာတွေနဲ့ ပညာရှင်ကြည့် မကြည့်တတ်ပါ။ ကြည့်လို့ အဆင်ပြေရင် ကြိုက်တာပါပဲ။ အင်ပရက်ရှင်း၊ ဆာရီရယ်၊ ကျူးပစ်ဇင် စတဲ့ ဝါဒတွေလည်း သိတယ်ဆိုရုံပဲ။ ကျောင်းတက်တုန်းကတော့ ရန်ကုန်က ပန်းချီပြခန်းတွေ ကိုတော့ တော်တော် လိုက်ကြည့်ဖူးပါတယ်။ လောကနတ်၊ အင်းလျားအတ်၊ ယုဒသန်၊ ဗိုလ်ချုပ်ဈေး၊ နယူးထရက်ရှာ စသည်ဖြင့်။ ကြိုက်တဲ့ ပန်းချီဆရာတွေလည်း မနည်းပါဘူး။

ဆရာကြီးမြင့်စော ရဲ့ မီးခိုးရောင်များများနဲ့ ဆွဲထားတဲ့ ကောင်မလေးပုံနဲ့ ဆရာဖေညွှန့်ဝေ ရဲ့ အနီနဲ့ အစိမ်း တွဲသုံးထားတဲ့ ဓမ္မရံကြီး ကို ခုထိ မျက်စိထဲမှာ မြင်နေပါသေးတယ်။ ဒါပေမဲ့ အဲဒီတုန်းက တကားကို ၂ ထောင် ဝန်းကျင်၊ မုန့်ဖိုးက တပါတ် ၅၀။ "ဝေးခဲ့ပြီပန်းခရမ်းပြာ" ကိုသာ ဆိုခဲ့ရပါတယ်။

မဝယ်နိုင်မှန်း သိသာပေမယ့် ပန်းချီပြခန်းတွေကတော့ ဖော်ဖော်ရွေရွေ ပါပဲ။ ဗိုလ်ချုပ်ဈေးတို့၊ ယုဒသန်တို့က ပြပွဲမျိုးမှာတော့ လာကြည့်တဲ့သူ အသင့်အတင့်ရှိလို့ လူအုပ်ထဲမှာ ရောနေပါတယ်။ အင်းလျားအတ်လို နေရာမျိုးမှာတော့ များသောအားဖြင့် ကိုယ်တယောက်တည်း၊ ကောင်တာ စားပွဲမှာတောင် လူမရှိတတ်။ တခါတလေတော့ ကိုအောင်မြင့် (နောက်ပိုင်းမှာ အမေပန်းချီနဲ့ အာဆီယံဆုရသူ) နဲ့ စကားစမြည် ပြောခွင့်ရပါတယ်။ ဒါပေမဲ့ ဘယ်ပန်းချီက ဘာအဓိပ္ပာယ်လဲလို့တော့ မမေးဖူးပါဘူး။ ပန်းချီမှာ အဓိပ္ပာယ် ရှိရမယ်လို့လဲ မယုံကြည်ပါ။

ရှားရှားပါးပါး ပန်းချီဆွဲဖူးတယ် ပြောလို့ရရုံ ၂ ကား ၃ ကားတော့ ဆွဲဘူးပါတယ်။ (လက်ထဲမှာ အလွယ်တကူ မရှိတာ သက်သာသွားတယ် မှတ်ကြပါ။)

သမီးကတော့ ကျွန်တော့်ထက်စာရင် ပန်းချီပါရမီ ပါပါတယ်။ ၄-၅ နှစ် သမီးကတည်းက စိတ်ဝင်စားတာနဲ့ ယဉ်ကျေးမှုက ပန်းချီဆရာမနဲ့ သင်ပေးပါတယ်။ ဆရာမလေးကလည်း ကလေးတွေကို တော်တော်စိတ်ရှည်တော့ အဆင်ပြေတယ်။ ခုတော့ ၉ နှစ်ပြည့်ခါနီး၊ သပ်သပ်တော့ မသင်ဖြစ်ဘူး။ ကျောင်းမှာ တပါတ်တရက် အပိုဘာသာ သင်ရတာမှာတော့ ပန်းချီ ယူထားပါတယ်။

သမီးက ဘယ်ဘဝက ဘာကောင်ဝင်စားတယ် မသိ အကောင်ပုံတွေပဲ အဆွဲများပါတယ်။ ဒါက သူဆွဲထားတဲ့ "ဆင်" ပုံပါ။ နားရွက်တော့ နည်းနည်းကြီးတယ်။

 Wild Elephant (Crayon on Paper)

meemeechaw.blogspot.com

သူ့ ကို ဘလော့ဂ်လေး တခုလည်း လုပ်ပေးထားပါတယ်။ ပုံတော့ များများ မရှိသေးပါဘူး ..